AF268: 44r

484 İşbu baḥr‑i bī‑nihāyetdür ăḫī
Söyle ne qıldı ḥekīm andan daḫı

485 Qıṣṣa‑i şāh u kenīzekden murād
Ne maqūle ḥiṣṣe aḫẕ eyler ʿibād

486 Ol ḥikāyet ḥālini erbāb‑i ḥāl
Ḫıżr u Mūsā ḥāline qılur mis̱āl

487 Sūretü l‑kehf içre rebbü l‑ʿālemīn
Eyledi bu maʿnaʾı şerḥ‑i mübīn

488 Qıl tefāsīre rücūʿ eyle naẓar
Gör Ḫıżır Mūsā‑yile ne faʿl ėder

489 Ḫarq‑i küştī qatl‑i nefs‑i bī‑günāh
Daḫı taʿmīr‑i cidār ey ehl‑i rāh

490 Eyledi sırrını bilmede ẕuhūl
Ḥażret‑i Mūsā gibi faḫr‑i fuḥūl

491 Enbiyā vü evliyānuñ ey kişi
Fehm olunmaz ʿaql‑i cüzv‑ile işi

492 Ẕī‑seʿādet aña kim aḥvālde
Defʿ‑i reyb ü şekk qıla bālde

493 Qīl ü qāl‑ile bilinmez sırr‑i ḥaqq
Bu ledünnī ʿilmden olmaz sebaq

494 Maḥż‑i feyż‑i ḥaq‑durur ʿilm‑i ledün
Bilmez anı oquyanlar kāna kün

495 Bu meʿānī baḥr‑i bī‑pāyāndur
Añlayan ʿilm‑i ledünnī cāndur

496 Añlamaz anı ḥavāss‑i ẓāhirī
Tā derūn‑i cāndur anuñ biri

Beyān‑i vaṣf‑i ʿilm‑i ledünnī

497 Qanqı ʿilmi kim beşerden bir beşer
Ögrenüb anı başardı ey püser

498 Aña dėnmez bilmiş ol ʿilm‑i ledün
Ḥaqdan aḫẕ ėder anı ehl‑i suḫan

499 Gerçi ʿilm‑i zırhı Dāvūda ḫudā
Min ledünnī dėdi bildürdi aña

500 Līk zırhuñ ṣanʿatını ūstād
Ögredür şākirdine qılsa murād

501 Var‑ise qıl bunda şānuñda naẓar
Bu le‑dün ʿilmin ḫudādan bildiler

502 Anı taʿlīm ėdemez nevʿ‑i beşer
Qīl ü qāl‑ile bilinmez ey püser

503 Gel‑berü bu bābı bunda qoyalum
Qıṣṣa‑i şāh u kenīze uyalum